تعــادل بطعم الخساره للهلال ....شوفوا قصتي بالملعب [الأرشيف]

مشاهدة النسخة كاملة : تعــادل بطعم الخساره للهلال ....شوفوا قصتي بالملعب

b l u e

06-05-2005, 10:40 AM

السلام عليكم

انتهت مباراه الديربي ومباراه القمه التي جمعت بين الهلال والنصر وسط حظور جماهيري كبير جدا من طرف الازرق

احرز الهدف الاول باولو ديسلفا في الدقيقه 11
عادل النصر بهدف الحارثي في الدقيقه 17

ضغط هلالي كبير ولكن؟؟

نقــاط:

*اول مره اشوف الملعب مليان على الاخر ووصل الحظور الجماهيري الى 19999 متفرج وانــا كملتهم وخليتها 20000 <<<لازم يكرموني :)

*اقيمت حرب جماهيريه حيث الجماهير النصراويه ترمي بعلب المياه والنعال<تكرمون> على الجماهير الهلاليه ...بس اخوننا ما خيبونا رجيناهم رج هع هع هع

* استمر الحال وتطوت الى رمي الاعبين انفسهم ؟؟؟!!!

*الامير يشكر كل شكره حيث اتى للجماهير الهلاليه وطلب منهم ان يقفوا تصرفهم الارعن

ولكن لا حياه لمن تنادي فيه ناس همج بس الله يهديهم

*تفوووق هلالي واااضح و اضاعه فرص بالجمله

*الى فاهم طلع قبل لاتنتهي المباراه بــ 5 دقايق

*انا جاي مع شباب <<لا يشيخ المهم ما طلعو الا يوم صفر الحكم

احنا جالسين فوق تمام ....ولله زحمه غير طبيعيه

المهم نزلنا من الدرج حبه حبه مالها داعي يصير تدافع

يوم وصلنا بسلام ادور اخوياي ؟؟؟مدري وينهم ؟؟؟ كنا 10 وما لقيت الا واحد يؤؤؤؤ

المهم انا قلت اشوا انك راعي السياره <<ما وده يركب تكسي هع هع

يوم كلمته وجينا بنطلع مع البوابه شفنا زحمه غير طبيعيه على الباب قلت لخويي خلنا بس نروح مع باب ثاني

قال اوكي

اول ما تحركنا رايحين للبوابه الثانه <مصدقين ان فيه بوابه

فجأه اشوف البوابه الرئيسيه واشوف الجماهير تركض ركض على ناحيتنا اقول وش ذااااا؟؟؟؟؟؟

ولله ركض غير طبيعي قلت لخويي امسك ثوبك وبله وراي ركضنا بأتجاه الي يركضون لمه واحنا نركض الا والناحيه الثانيه يركضون ناحيتنا
الله لا يوريكم صار تصادم وتدعيس

ما ادري ليه ركضوا الا الحين؟؟؟

المهم مشينا ورا ورا الثيل ورا الاشجار

والتفت يساري لقيت واحد كبير معه عياله حوالي 5 يمشيهم

يقولي هاااه نقدر نطلع الحين ؟؟.... والله رحمته قلتله اصبر احسن لك ولعيالك

طلعنا ولله الحمد من اسوار المعلب الي كنه اسوار الكتراز هع هع هع

بس ولله زحمه غير طبيعيه والحمدلله وصلت سااااالم :)

خضراء اليمامة

06-05-2005, 02:24 PM

مرااااااااااااحب ..

هلا والله أخوي Blue ..

أنا بصراحة أعتبر مباراة أمس فوز لنا ..

وربي ضاغطين حيل .. وخصوصاً نصف الشوط الثاني ..

وخسارة إننا نتعادل ..

أما الجماهير شكلها جنااااان ..

بس ما لحقت على الهوشة .. << قهررررر ..

وأهم شي إنك رحت مع راعي السيارة عشان ترجع لنا ..

بس تدري ..

رحمت أبو العيال .. << الله يجزى والدينا بالجنة ..

عموماً ..

الحمد لله على السلامة ..

وهارد لنا إننا ما فزنا ..

يسلمووووووو أخوي Blue على هالتغطية الحلوة ..

خليتني أحس كأني في الأستاد ..

يعطيك العافية ..

خضراء اليمامة ..

b l u e

06-05-2005, 02:55 PM

الله يعافيك ومنوره بمرورك اختي

تصدقين ما نقصنا بالملعب الا انتي :)

وبالتوفيق لمباراه الهلال امام الاتحاد يوم الاثنين وانشالله تكون الخامسه بعد :)

مشكوره على مرورك الرائع

دحومي

06-05-2005, 05:57 PM

مشكور على التغطية

اما انا في وقت المباراة كنت في الثمامة في طعس الهرم((النقا)) كان فيه مهرجان تبع ريد بول تحدي مرهمات

والله هبال ومرهمات احلى وجلسنا هناك إلين الساعة 2.00

وراح تشوفون تغطية باللي صار هناك مع مقاطع

مشكور اخوي بلو وصراحةً انا مع اني مانيب راعي كورة مرة لكن اتمنى الهلال يفوز وكنت متوقع لكن ماحصل
إلا التعادل

مشكور بلو

صقر نجد

06-05-2005, 06:06 PM

مبروك للنصر الفوز بالبطولة ..

تعادل مع الزعيم أشبة ببطولة القرن ..

أمس (( أعطني حظ النصر في الشوط الثاني وأرمني في البحر )) << الشوط الثاني لأني لم أشاهد الشوط الأول !

الخوجلي .. وعلامة استفهام من هنا إلى باب مكتب .. رئيس رعاية الشباب ..

هاردلك للهلال ..

أشكرك أزرق ..

وبأنتظارك أخي دحومي وتغطيتك للمهرجان ..

ألف تحية

b l u e

06-05-2005, 06:24 PM

احنا بأنتظارك اخوي دحومي

ومنور بمرورك

اخوي صقر من جد حظ ربك ستر

لا واخرتها يقولون احنا احسن واحنا نستاهل الفوز ؟؟؟

خضراء اليمامة

07-05-2005, 12:44 AM

هلا والله أخوي Blue ..

اعذرني على الـ back ..

بس حبيت أقول كلام صغينووووون ..

وهو :

إذا بغيتوا تروحون لمباراة الهلال والاتحاد مرّوا علي .. عشان تصير مباراتكم كاملة .. :)

هههههههههههههههههههههه ..

يسلموووووووووو ..

ويعطيك العافية ..

خضراء اليمامة ..

b l u e

07-05-2005, 03:57 PM

هلا ولله

welcome back

حيااك

اجل خلاص البسي ثوب وشماغ وتلطمي هع هع هع

+
ومالعيك المكان انا ادبره مكان استراتيجي محد يجيه :)

بس شوفي تكونين جاهزه عند الباب اسويلك مسدكول وتطلعيلي على طوول منب فاضي استنا :)

ابي اصلي المغرب عندكم وبعدين امرك على طول

بس ترا مالي دخل بالتذاكر انا معي بطاقه الزعيـــم <<<<< يدعمهم بأي شكل لوول :)

واذا كنتي تبيني اشتريلك عطيني 15 ريال هع هع هع

مشكوره على مرورك الخفيف دم ومنوره مره ثانيه

اجملـــ تحيه

خضراء اليمامة

07-05-2005, 09:29 PM

شف .. << بمعنى أنظر لغير الناطقين بالوشيقري ..

أنا وحدة ما أنعطى وجه ..

وإذا بتقول : " وش جابها ذي للمرة الثالثة على التوالي ترد على الموضوع ..؟ " لا تكمل الرد ..

أما إذا " حيّاني الله " فاستلم ردي ..

هو أكيد لو بأجي بألبس شماغ وثوب .. بس وش أسوي بشعري ..؟

والا تدري كأني واحد عربجي .. :)

أما بالنسبة للمكان ..

أنا أبي في المنصة الملكية .. عشان أسلم على اللاعبين .. :)

ودام إنك أنت اللي دعيتني فعليك الحساب ..

حتى العشاء والسحور عليك .. << الأخت راعية طويلة ..

يسلمووووووو أخوي ..

ويعطيك العافية ..

خضراء اليمامة ..

العكلاوي

07-05-2005, 10:22 PM

تغطية جميلة يا b l u e
على العموم يعتبر هذا التعادل فوز للنصر الذي أصبح من اضعف الفرق
والله تمنيت نتقابل وياه على كأس ولي العهد بس ما تحقق اللي أنا ابيه

على العموم أنا لي أكثر من 6 سنوات ما حضرت مبارة في الملعب ولكن لما شفنا مستوى الهلال يتطور قلنا لازم نحظر ونساند الزعيم ولاكن ما الله كتب نفوز ونتصدر مع الشباب الدوري

غمازة

08-05-2005, 01:12 AM

سوري شباب مداخلة معاكسة :

ان لم تصل للعالمية فحتما انت خلف النصر (العالمي) ;)
مشكوررر بلو على التغطية الحلوووة ...

WOLF

08-05-2005, 03:43 AM

الف الف الف مبروك للنصر هذا التعادل .. وحظ اوفر للهلال :(

انا وبلو قاعدين فوووووووق اعلى شي .. والله يخوف وحلو في نفس الوقت

بس احسن شي وقت الترجييم هههههههههههههههه انوااع الفله

تشوف قارورة موية تمشي مليونين عاااادي

اما عن نفسي . فانا والعيال طلعنا من الدقيقة 35 من الشوط الثاني .. عشان الزحمه وعشان نروح استراحتنا نلعب كوورة .. الا يا دب يا بلو ورا ماجيت ؟؟ -.-

برايفت للعكلاوي : ابو عكل كانك بتشوف مباراة الهلال والقادسية على كاس ولي العهد . انك تشوفها معي في الملعب قل تم :)

ويعطيك العافيه يا بلو ..

دودي

08-05-2005, 03:02 PM

b l u e

08-05-2005, 05:43 PM

مرااااحب

هلا ولله بخضراااء

حياك الله مره ثانيه وثالثه ورابعه بعد

عادي تنورين الموضوع كل مره :)

اجل تبين المنصه هههه بدري

اوكي خلااص ما عليك اخليك تسلمين على اللعيبه

العشا وفهمناها بس السحوور؟؟؟ لاتكونين تصومين اثنين وخميس ؟؟ هع هع ةلا بس زياده اجر ماشالله عليك

b l u e

08-05-2005, 05:47 PM

ياهلا ولله بالعكلاوي
منور الموضوع ولله

الصارحه انت شجاع انك تمنيت النصر على النهائي

اما انا لاااا كل شي ولا النهائي مع النصر يطلع فيهم لعب؟؟

كل الموسم خاايس بس اذا لعب مع الهلال خلاااص يطلعوون كل الي عندهم

والله يعين ويوفقنا وياهم

مشكور على مرورك الكريم اخي الكريم

b l u e

08-05-2005, 05:51 PM

هلا ولله اخوي غماازه

اجلــ نصرااوي هع هع هع عااادي مافيها شي اهم شي انه فريقك واعذرنا اذا كنا متحيزين ناحيه طرف واحد بس القلب وما يهوا

اقتباس :

ان لم تصل للعالمية فحتما انت خلف النصر (العالمي)

همسه في اذنك :

مهما سويتوا ورحتو ا وجيتوا منب جايين زي الهلال وحتى الترتيب العالمي يشهد

ولا تنسى الهلال عــــــــــــــالمي

يعني تأهلنا لكأس العالم للأنديه للمعلوميه وحطوا جدول المباريات وخلاص بس الغيت فجأه

بس زي ما قال الدبل الهلال عــالمي

مووو حـــالمي

زي بعض الناس :)

منور بمرورك الكريم

b l u e

08-05-2005, 05:53 PM

هلا ولله بووولف اخبارك ؟؟

اخبااار القطوووع؟؟

اجلــ كذا تسحبون علي ؟؟

هع هع هع هع

اهم شي اكيــد ما جاك موي صكت بجبهتك ؟؟ هههه

ولله مهب غريبه

ولله يعافيك ومنور بمرورك

b l u e

08-05-2005, 05:55 PM

هلا اخوي دودي

عندك شي قوول لا تسوي اقتباس بش مالك دخل فيه :)

منور بمرورك

غمازة

08-05-2005, 07:05 PM

ما ودي اتعمق بهذا الموضوع لأني شبة تارك الكورة بشكل عام والنصر بشكل خاص ، بس عندي تعليق ;)

حسب ما سمعت ان الدبل قال :

البطولة العالمية الأولى اقيمت في البرازيل و شارك فيها النصر (العالمي) :D
والبطولة الثانية راح تقام ان شاء الله بطوكيو باليابان وان شاء الله راح يشارك فيها اثنين من فرقنا السعودية الإتحاد أو الشباب أو الأهلي ... << الكلام هذا مو من كيسي بل من كيس الدبل :rolleyes:

يعني بالمحصلة التاريخية فان البطولة الملغية التي تأهل لها الهلال لا تعد من ضمن التاريخ وأنا بصراحة يهمني الجانب التاريخي لأنه هو اللي يضمن ويثبت ويوثق حقوق أي فريق كان ...

بالنسبة للترتيب العالمي !! كني سمعت الدبل يقول ان هذا الموقع ماله علاقة بالفيفا << برضو هذا الكلام من كيس الدبل مع ان الهلال يستاهل ...

واذا قال الدبل ان الهلال عالمي فهذا لا يتعدى رأيه الشخصي وحتى انا اقول ان الهلال يستحق العالمية بجدارة بس للأسف لحد الأن لاوجود لإسم الهلال بالفيفا لأن ما له مشاركات عالمية واذا كان موجود فالله لا يهينك ارسلي رابط من الفيفا يحتوي على اسم الهلال السعودي بأنه شارك بأي بطولة عالمية وانا بدوري لو تبي ارسلك رابط من الفيفا فيه اسم النصر السعودي والهريفي ما عندي مانع ...

شدوا حيلكم يا أبطال بالتأهل للبطولة الثالثة ان شاء الله فأنتم قدها وقدود بعدها أقدر اسميكم عالميين وتقفون بجانب النصر وغيره من الفرق المتأهلة ...

تحياتي لشخصك الكريم ...