كانت صديقة طفولتي !!!

[ملاك]

كنت أمشي في القاعة متوجهة لصالة العشاء ولاهية أسولف مع أختي ..
إلتقت عيني بعينها ..
وجه مألوف .. شفته كثيييييييير .. لا لا ماشفته وبس .. عشت معه أيام طويله .. سنوات !!!
هي .. مو هي .. هي .. مو هي ..
إلا هي ..
كل هذا الحديث دار بذهني لحظات .. وأكيد دار بذهنها بعد ..
لأننا في نفس الوقت بصوت واحد قلنا ( فلانة ) << كل وحدة نادت الثانية باسمها ..
ثم اعتلت ضحكاتنا وتعانقنا طويلا .. كيف لا ..وهي صديقة طفولتي ..
ياااااه يالبراءة تلك الأيام ..
بعلّم عليك الأبلا ..أنا العريفة ..معك سلف ريال .. << وشلون تجي ذي !!
قطعت علي حبل أفكاري
قالت : .. تغيرتي كثير ..
قلت .. وأنتي ..
أنا ماكنت أقصد التغير في ملامحها الي على الرغم من انها تغيرت كثير الا انها تغيرت أكثر بشكلها .. طريقة لبسها وكلامها ..
قلت في نفسي ..يؤ يؤ يؤ .. وش هاللبس .. فوق الركبة !! والأكتاف والصدر مالقو شي يسترهم !!!
والا قصّة الشّعر .. ولونه الي مدري وش يبي .. << يختي اصبغي وقصي ماقلنا لا بس عاد لا تصيرين نشاز !!!!
قطعت علي تفكيري ..
ها ملاك شخبااارييييقق << شخبارك بس بميوعة
قلت تمام الحمد لله كمّلت دراسة وتزوّجت وعندي ...... وقمت أسرد لها قصّة حياتي ..
وهي تسمع وعيونها طايره من الاستغراب ..
كيف لا وهي حياتها معاكسة تماما لحياتي والحمدلله ..
لمّا خلصت سألتها عن نفسها فبدت تحكي بكل فخر ..
هي : أي دراسة وأي زواج وأي بطيخ ..
أخذت دورة 6 شهور وبواسطة اشتغلت في بنق الـ... << بنك
أنا : بنك الـ ... طيب هذا بنك ربوي .. يعني راتبك حرام ..!!
هي : يااااشيخة كل شي في هالدنيا خليتوه حرام .. الدين يسر ..
خليناااااااه !!!!!!
من احنا ؟؟
أنا : طيب ماتزوجتي ؟
هي : لا .. مو على كيفهم هالرجال
الي يقول تتركين الوظيفة والي يبي نص راتبي ..
أنا راسمة على شايب منغنغ يكب علي الفلوس كبّ
أنا : بس الفلوس عمرها ماكانت سعادة ..
هي : أقوووول بلا فلسفة .. الا هي السعادة .. بالفلوس تقدرين تصيرين أسعد إنسانة ..
تشترين الي تبين حتى الزوج الي تبينه ..
أنا : بس الزوج الي بتشترينه بيصير داخل على طمع .. وبكذا نصير رجعنا لنقطة البداية ومااستفدنا شي ..
ميّلت وجهها عني شوي .. وبعدين رجعت ..
ملاك .. أنا سعيدة بشوفتك .. تمنيت اقعد معك وقت اطول .. بس السيارة عند الباب .. معزومة على سهرة ثانية .. وقلت ارضي الطرفين ..
رافقتها عند الباب .. أخذت عبايتها .. لبستها .. وليتها مالبستها ..
ليتها طلعت بالهيئة العارية الي شفتها عليها ..
لبست عباية كأنها فستان سهرة .. ولفّت الطرحة اللّمّاعة ووضعت بقيتها كلثمة تظهر عينيها وخدّيها المليئة بألوان الماكياج ..
ماكان عندي الوقت الكافي .. << قولي الشّجاعة الكافية .. لنصيحتها ..
سلّمت علي بحرارة .. استجمعت كل قوتي وهمست بأذنها .. الله يعيننا ويّاك على الحساب والعقاب ..
ماكانت تجهل أبدا وش كنت أقصد .. فهي تشوف نظراتي الحزينة لـ لوكّها الي شعاره خالف تعرف ..
ردّت علي : الله غفور رحيم .. ثم أعطتني ظهرها وطلعت ..




حمدت الله من كل قلبي أن منّ علي وعلى أخواتي بالسّتر ودعوته لنا بالثبات ولأخواتي المسلمات .. بالهداية والثبات

إنتهت قصتي احبتي ..

الدين يسر .. الله غفور رحيم ..!!
كل هذا شي أكيد وكلّنا عارفينه .. لكن الله يغفر للتوّابين .. موالّي يسوي المعاصي ويقول الله غفور رحيم ..
الآن مانروح مكان عام ( نسائي طبعا ) مانشوف الا التنانير القصيرة والتيشيرتات سيور والبنطلونات والبرمودات يظنّونها كشخة مادرو ان أبو عشرة ملياااان من هالأشكال ..
نقدر نسوي لأنفسنا أحلى وأكشخ طلّة ونماشي الموضة .. بس بدون مانبيّن أجزاء من جسمنا !!





لاتحرموني من تعليقاتكم ..
وأرجو التعليق على من يرد عليكم بعد النصيحة بـ الدين يسر أو الله غفور رحيم .. أو ماشابه ذلك ..
والسلام عليكم ورحمة الله وبركاته ..

[هبوب]

وعليكم السّلام ورحمة الله وبركاته


ملاك



الهدايه من الله

والإنسان يعمل السّبب


وهذا هو دورنا في المجتمع

النصيحه



لعل الله يغيّر الحال

ونكون سبب في سعادة شقي





أسعدك الله في الدّارين

[متعب الشوووق]

ملااااااك


ان الله يهدي من بشااء

ونحن في زمن تقل في النصيحه وعندما تقوم بنصيحة احد فهو يتوقع انك تكرهه او حاقد عليه وانما هي من محبه له وللخير

ولكن المشكله من البيئه المحيطه للفتااة والأسره والتربيه

مشكوووره ملاك ع طرحك لهذه القصه 000

تقبلي تعليقي البسيط

[منتهى السعاده]

الحمد لله انك نصحتيها

في بعض الناس لا يستطيع النصح

في الزمن القريب كانت الموضه الفستان الغالي

اما الان الفستان الي يجذب ويثير الانتباه يعني الخالع

الله المستعان

مـــلاك هل لو شفتي صديقتك مرة ثانية هل تنصحينها

بارك الله فيك

[بنت عز]

الله ويا ملاااااك يا كثر ما نشوف مثل ها الحالات....
واي نصيحه ...محد يقبل نصيحه....

يعني هم ما يدرون ...شنو الحلال والحرام...

الكل يدري الكل يعرف ...محد يجهله شيء,,,

الحين اذا نصحتي احد من تحت لتحت من غير ما تخصين زعلو ا ما عاد كلموك...

انا مثلك انعزمت مرره زواج ....وياليتني مارحت ....
ما كانا في ديرتنا ..حاطين زفه كنيسه....وانواع الاغاني الغريبه...والبس يا ساتر...مقزز

وقالت لهم وحده ياليت تقصرون على الصوت ...قالت بلا تخلف...

انا بس غرقانه في دموعي والمكياج يخرب ..وطالع السقف ...اخاف الله يخسف بنا....



لان العقوبه تعم...

ما في اليد حيله ....

كل الي نقدر نسويه نطلع ونخليهم...وندعي لهم

الله الهادي...

والله يفتح علينا وعليهم

ويستر علينا وعليهم...

ويرحمنا برحمته ويفتح على قلوبنا...جميعا

[Ǎ š M ẫ]

السلام عليكم ورحمة الله وبركاته
هلا اختي ملآك ..
موضوعك والله مهم في زمن كثرة في الفتن ..
المشكله ان فيه حديث نصـآ على ان هالعري ّ والتكشف والتبرج محرم ..قال صلى الله عليه وسلم (صنفان من أهل النار لم أرهما: قوم معهم سياط كأذناب البقر يضربون بها الناس.. ونساء كاسيات عاريات مائلات مميلات رؤوسهن كأسنمة البخت المائلة لا يدخلن الجنة ولا يجدن ريحها وان ريحها ليوجد من مسيرة كذا وكذا، وفي رواية وان ريحها ليوجد من مسيرة خمسمائة عام)
ومع ذلك مصرين على فعلهم ..
انتشر العاري والملابس الساترة صارت قليلة ..
والأسوآق حدث ولا حرج والله الوآحد يستحي يشوفهم من كثر ماهم متبرجين
لكن من المسؤل عن من يفعل ذآلك .؟!!
المسؤول عن ذلك وليُّها في المقام الأول
أمام الله ..َ!
فأين الغيره والشهامةحينما تخرج الفتاة غير محتشمة امام مرأى ناظريه ..!!
وأين الأم التي تجعل من ابنتها سلعة تعرض جسدها في كل مكان....!؟
وأي جمال يبرزّ اللذي يلحقه العار ..!
اللهم ثبتنا على دينك يامثبت القلوب..
عافاك الله ملآك ..
وأسأل الله الهدآيه لها ولنا ولجميع المسلمين ..
مسرعه بشويش

[شموخ عزي]

موضوع كبير ياملاك..
فتن تحيط بنا اينما اتجهنا
والفائز من يصمد امام هذه الفتن
ويجاربها بالقرب من الله
والله يهدينا ويهدي الجميع
ويعطيك الف عافيه

[خضراء اليمامة]

وعليكم السلام ورحمة الله وبركاته ..

هلا والله ملوكة ..
إييييييييييييه وأنا أختك ..
كل شي تغير ..
ناس ما توقعنا بيوم من الأيام يتغيرون .. لأن مبادئهم كانت ثابتة ..
ويجي يوم ننصدم إنهم مشوا مع غيرهم في طرق ما لها علاقة بمادئهم ..

صديقتي واللي كانت ما تبي تتزوج إلا مطوع .. << هذا طموحها ..
وكانت أكثر الناس متمسكة بمبادئها ..
أنصدم بيوم من الأيام أشوفها لابسة فوق الركبة .. ونامصة ..
والخافي ما ندري عنه ..

بجد كانت صدمتي كبيرة ..
وحاسّة بصدمتك ..

لكن الحمد لله لى كل حال ..
اللي علينا النصيحة والثبات على حالنا ..
وما نمشي وراء الموضة كأننا " إمعات " ..
ويكون لنا رأينا في كل شي ..

جزاك الله خير يا ملاك ..
ولا تضيقين صدرك ..
أنتي سويتي اللي عليك ..
والشكوى لله ..

الله يهديها ويهدي ضال المسلمين ..

خضراء اليمامة ..

[صدوقة]

وعليكم السلام ورحمة الله وبركاته،،

عااااااااادي .. وش فيكم معقدين السالفة .. ياناس هذي الموضة ..
يعني تبونهم يصيرون قراوة ؟؟

الله المستعان بس ..
صارت الموضة هي اللي تحكمنا مو ديننا وسترنا ..

يا ناس أكبر دليل على جهل البعض إنهم طول عمرهم ينمصون .. ولو تجي الموضة بالحواجب الكثيفة خلّو حواجبهم وما نمصوها ..وهذي صارت من فترة ..

مو عشان الدين قال حرام .. ولا عشانه قال لعن الله النامصة ..
الله يهدينا ويّاهم أجمعين ..

ونماذج صديقتك يا ملاك كثييييير .. الله يردّ لهم عقولهم ..

مشكورة ملاك على هالموضوع المؤلم ،،

[ملاك]

هبوب .. اللهم آمين .. جزاك الله خير .

متعب الشوق .. صادق والله .. عوامل مهمة تأثر على الشخص وتقلب حاله .. ألف شكر .

منتهى السعادة .. كلامك صحيح .. لكن تمنيت ان لدي الجرأة أكثر ونصحتها لفترة أطول ..
أما لو شفتها مرة ثانية فأعتقد اني راح انصحها بإذن الله .. بارك الله فيك .

بنت عز ماتهتز .. اللهم آمين .. قصتك تحكي حال بعض العائلات اليوم .. المصيبة انهم مو كل سفيهين أو صغار في السن .. فيه الكبار الي عاشو في زمن الستر والدين الي مايشوبه شوائب المعاصي ومع هذا .. غرتهم الحياة الدنيا ..
الله يهدينا وياهم .. مشكورة قلبي عالرد .

مسرعة بشويش ..آآآآمين .. المصيبة ياقلبي لو قلتي لوحة من هالأمهات شي قالت (ماقدرت عليها) ولو كان الموضوع دنيوي كان قدرت وبقوة ..
أما عن الولي .. فالله المستعان .. أعرف لك وحدة ملتزمة قبل الزواج وبعد ماتزوجت أجبرها زوجها على عباية الكتف .. الله المستعان !!! جزاك الله خير .

شموخ عزي .. آمين .. إضافة قيمة .. الله يعافيك ..

[ملاك]

هلا والله خضّورة ..

النمص عاد له قصّة ثانية الله يعافينا وياكم والمسلمين ..

يدرون ان عقوبته اللعن ومع كذا .. مجاهرة بالمعصية ..

ولا أنسى أختي الي لمّا نصحت وحدة وقالت لها عن العقوبة قالت .. أنا ملعونة من عشر سنين !!!

لا حول ولا قوة الا بالله ..

شاكرة لك الإضافة القيّمة .

هلا وغلا بصدّوقة ..

إي والله صدقتي .. ولو دخلو جحر ضب لدخلوه ..

الله يعافينا مما ابتلاهم ..

يعطيك العافية .

[احبك وشيقر]

وعليكم السّلام ورحمة الله وبركاته


ملاك



الهدايه من الله

والإنسان يعمل السّبب


وهذا هو دورنا في المجتمع

النصيحه



لعل الله يغيّر الحال

ونكون سبب في سعادة شقي





أسعدك الله في الدّارين
وانت الصادق هبوب

تسلميين على القصه حلوة