حلى في دقيقتين.. والله ما أنصّب عليكم !!

[الليدي عمشاء]

مساكم الله بالخير يا الشيفات خخخخخخخخخخخخ:36_21_2[1


وش أخباركم

ووش علومكم

ووشلون من يعز عليكم

ووشلون عيالكم

ووشلون أبو عيالكم :050103nor

ووشلون كل أبو الناس << أبختصر عشان الوقت خخخخخخخخ

عندي حلى وش مليحته ..

وما وجد هذا الحلى إلا للحالات المستعصية .. وهذه الحالات :

الحالة الأولى :
يجيك أبوك ويقول ترى عندي رجال وبسرعة زيّني قهوة << وطبعا لازم تسنّعين وتزينين حلا كود أحدن منهم يخطبك خخخخخ:120103_em

الحالة الثانية :
يجيك رجلك ويقول ترى أبو فلان وأبو علاّن بيجون الحين يتقهوون عندي << وفي هالحالة لازم تتسنعين عشان يقولون ما شاء الله على خويّنا ذا يا إن عنده حرمتن سنعة !!:110103_po

الحالة الثالثة :
بتجيك وحدة من خويّاتك اللّزقات اللي تدق عليك الجوّال وتقول افتحي أنا عند الباب !!:36_11_7[1

الحالة الرابعة :
يجيك أخوك ويقول أخوياي عندي سوّي لي أي شي يوكل << وطبعا لازم تتمصلحين معه عشان يودّيك لأي مشوار تبينه وبما فيهم السوق !!:050103tra

الحالة الخامسة :
وأنتي قاعدة أنتي وخواتك وأمك وأبوك يقولون والله إننا مشتهين شين حالي مع القهوة << وطبعا بتصيرين أم الفزعات ..:36_6_10[1

المهم في كل الحالات الخمس
أنتي تتعرضين لمشكلتن عويصتن
والحل عندي وأنا أبو هندي .. قصدي أم هندي ..
الحلى بكل سهولة وبكل صراحة وبكل مصداقية .. لا يتعدّى الدقيقتين ..

وهو : << ووه ما بغت تخلص وتقوله خخخخخخخخخخ



المقادير :

* كيك يمامة بالعدد اللي تبين << اشتري كرتون أوفر فيه درزن وبخمسة ريال بس خخخخخخخ
* علبة حليب مركّز اللي هو نستله
* جوز هند

بس هذي هي كل المقادير ..

الطريقة :

نجيب وحدة من الكيكات .. ونفتح كيستها .. ونقطع الكيكة إلى مربعات أو مستطيلات أو مايلات بأي شكل تبين وتصير تقريبا ثلاث قطع أو أربع اللي تبين وبعدين تغمسين كل قطعة في الحليب المركز وبعدها تغمّسينها في جوز الهند وتحطّينها في صينية التقديم .. وبس .


وبالهناء والعافيه تخيلوها الآن مع القهوه شئ يهبل ..:mouse:

افرحوووووووووا قضيت هذرة خخخخخخخخخخخخ

تسلموووووووووو لي ،،

[صقر نجد]

الله يحوم كبدك :050103diz

[الليدي عمشاء]

وش يبي ذاااااااااااااااااااااااااااا ؟

هيه أنت يا الأخو ؟

من سمح لك تدخل هنا أصلا ؟

ووشلون تدخل من غير ما تتنحنح والا تقول يا ولد ؟

تحسبك في بيتك .. والا يعني في بيتك ؟

بس الشرهة مهيب عليك على أختك اللي مخليتك تغلط على خوياتها وما تفكر تسوّي لك هالحلى وتذوقه لك في كل وجبة .. << وش ذنبها حطّت حرّتها عليها خخخخخخخخخخ



يا الله انقلع

وجعلك إن شاء الله تستفرغ اليوم من حومة التسبد !!

[خضراء اليمامة]

السلام عليكم ورحمة الله وبركاته ..

مساك الله بالنور والسرور والزهور والعطور .. << يا ويلي ويلاااااه .. << قلبت الأخت ..

بس من بدايتها تغلطن علينا ..؟

احنا شيفات ..؟

الشيفة أنتي وأشكالك ..

" فخش خهشخه خهشخخه " << أختها تهمس في إذنها ..

عفواً ..

نعتذر لهذا الخلل الفني ..

أختي وضحت لي قبل شوي إن الشيفة مو بالمعنى اللي فهمته ..

عشان كذا عذراً ..

المهم يالشيفة .. << لا تفهمين خطأ ..

الحالة الأولى :

أصلاً أصلاً أبوي ما يعزم أحد ..

الحالة الثانية :

إذا صار عندي رجل لجأت لموضوعك ..

الحالة الثالثة :

يووووووووووووه .. هذا وقته ..

يا كثر ما صارت .. الله لا يبلانا ..

دقت علي وحدة اسمها " الليدي عمشاء " وقالت : " افتحي الباب أنا عنده " ..

وتوهقت ما أدري وش أسوي ..

وفي الأخير اضطريت أجيب لها تمر ..

وللحين حاقدة عليها عشان كلت تمرنا ..

تبيني أسوي لها ..؟

يكفي إنها جاية من غير دعوة ..

الحالة الرابعة :

أبد أبد .. يكفيه القهوة .. ما له داعي شي معها ..

الحالة الخامسة :

اهاااااااااااا ..

الحين هذي حاجته ..

إيه قولي كذا من الأول ..

والله يعطيك العافية يا أم هندي على هالطريقة المنتازة والسهلة ..

يعني المقادير وفينا نوفرها أي وقت .. << الله يعافي بقالات التوصل ..

بس تعالي ..

دام إنه ما يكلفك دقيقتين .. إذا جيتي لي سويه وجيبيه معك ..

وأنا علي العشاء .. لا وأندومي بعد .. << كلهم ياخذون دقيقتين ..

تسلمييييييين يا وخيتي على هالطريقة الحلوة ..

ويعطيك العافية ..

خضراء اليمامة ..

[فتاة أشيقر]

مراااااااااحب ياعموشه الشيفه<<أبمسكها عليك الين الأبد... نياه نياه نياااااه..
وبعدين . وش ذا الحلى .. الظاهر أختك الصغيره علمتك اياه وانت..هيه هيه..ماتنعطين وجه( مخفه) علطول قلت أبحطه بالمنتدى خل يعرفون اني سنعه عشان يخطبوني.. ههههههههههههههههههههههههه.. هذي نيتك اعترفي..


على العموم.. اللي بيجي فجأه يحمد ربه اني بحط له تمر مع القهوه ومن ناحية الحلى يمدحون أقرب بقاله ( توكس).. وأعلمه على طريقه تخليه يمووووت في شي اسمه توكس( متأثره بالدعايات) واذا كان فيه سكر<<متبليه عليه... عاد يشرب قهوته وهو ساكت,, عشان أخذ التوكس حقه.. هههههه..


طحياتي:: فتو,,,

[خالتا عمتا]

السلام عليكم ورحمة الله وبركاته
شكل ذا الحلى ماخذته في حصه التدبير ههههههههههههه تحديدا رابع ابتدائي
فشلتينا عند الشباب وعرفو سر سنع البنات ؟؟

[يكفيني غــ ـرور]

والله انكن ولا شي

تجي الوحدي سردي مردي تدور حلا

وبالاخير تقولون لها هالحتسي

والله انك سنعه يا الليدي

لا وشيفه الشيفات بعد

ياجعله دوم

*********
خضراء ,, لو اجيك فجاه وش بتسوين ؟؟

[سحله]

يا خالتا عمتا
ماخذته في ماده النسويه
ههههههههههههههههههه

[عيون البشر]

اما الحلى ذا ههههههههههههه


مليييييييييييييييييييييييييييييييييييييييييييييييي ييت منه كل ماقلت ابي حلى راحو يتراكضون مراكض بس عشان يجبون لي نفس الحلى الي انتي كاتبه لايكون انتي الي معلمتهم عليه الله يستر منتس بس


شوفي اذا انتس انتي الي معلمتهم راجاء خاص قولي لهم عشان يغيرونها ولاشوفي لهم حلى ثاني لو يحطون بدال المركز نيدو بس قولي انتي لهم عشان يقتنعون اما انا لو اقول بالعذابين والله مايقتنعون

[الليدي عمشاء]

خضيرووووووووه
أبرد على حالاتك هاللي بررتي لي فيهم تبرير مثل وجهك ..

الحالة الأولى :
والله من القعطنة بعد فيك أنتي وأبوك ..

الحالة الثانية :
يا جعلك تعرسين اليوم قبل بكرا

الحالة الثالثة :
بدري عليك أجي لك ولأشكالك ..

الحالة الرابعة :
أنظري إلى رد الحالة رقم 1

الحالة الخامسة :
عطيني رقم أخوك بس بسلّم عليه ..

بعدين من قال لك إني بجيك عشان أجيبه معي ..
يا الله انقلعي ،،

[الليدي عمشاء]

جتنا القعيطية الثانية فتو
أختي والا بنت الجيران اللي معلمتني إياه ما تفرق ..
أهم شي السناعة ..
والا ما يولد الإنسان عالم << ياهووووووووووووه على هالحكي العاقل !!
على العموم تراني بجيك اليوم .. دام الدعوى فيها تويكس .. وله طريقة بعد .. تمام التمام والله ..
افتحي الباب جيت ،،

[الليدي عمشاء]

هههههههههههه
خالتا عمتا الله يهديك بس ..
هذا الحلى عشان يقولون الناس إننا سنعات ..
طبعا هذا في الحالات المستعجلة .. لكن لما يصير عندك وقت سوّي إن شاء الله حمار القايلة ..
هوّا حد حايشك ؟
مشكوووووورة على المرور ،،

[الليدي عمشاء]

يا نااااااااااااااااااس يلوموني في حب أم شوشة
يا ااااااااااااالله لا تخليني منها ..
وووووه بس وش أقول ..
تتزوجيني ؟ خخخخخخخخخخخخخ << ضربت الفيوز معليش !!

[الليدي عمشاء]

يا سحلة وأنا اختك ..
وين طلعتي لنا منه ؟
فعلا لكل من اسمه نصيب ..
وش نسويّته ذي ؟
وين جبتيها منه ؟
يا قدددددددددددمك ،،

[الليدي عمشاء]

عيون البشر ..
هههههههههههههههههااااااااااااااااااي
مزدين فيك والله هالخوات ..
وشوله حلا أصلا ..
يمدحون التمر والقهوة .. والا أقول لك التمر والماء ، القهوة تاخذ وقت في تصليحها ..
يا الله بس بلا عجز ..
اخدم روحك ،،

[الغريبة]

اختي الليدي عمشاء

مساء الخير عليك وعلى الجميع

وشكراااا على هذا الحلى السريع ,,,

لكن جووز الهند !!! ممممم ما أحبه مرررة لكن بجرب يمكن أحبه

شكرا على الحلو وعلى إسلوبك الأحلى

[منتهى السعاده]

http://www.ushiqer.net/vb/mwaextraedit4/extra/80.gif

[أبو أسامة]

الضيف اللي ييجي فجأة

بنسوي له

سد الحنك

[وشيقريه مالها مثيل]

تصدقين عـآآد أنه موب شين
يعني باتسر أسويه لأهلي وأقولهم سااعه وأنا أسوي فيه ياويلكم لو ماتاكلونه خخخخخخخخ
يعطيك العافيه يالليدي

[ღ العذوب ღ]

يآ ســـلآم .. حلآ سهل مرّة و مآ يبي له ~


مشكووورة ..

الله يعطيك العآآفيــة :)