مسابقة احلى ^- -^طبخة عزابية ^- -^ &&&للبناات والشبااب!!!!

[رجة بس رزة]

--------------------------------------------------------------------------------

اهلا بكم مجدد ...اعضاءمنتدى اشيقر...
طرحت عليكم هذه المسابقه .....
فكرة لإنقاذ العزوبية من عزوبيتهم ......
وهي اننا نفكر بطبخات سهلة وحليلة وعلى قدهم ....يقدرون يبربسونها بأنفسهم ....مع جودة النتائج طبعا...
وعشان كذا بنبدأ معكم مسابقة ....
أفضل طبخة عزابية ...
***********************
شروط المسابقة ...
1- ان لايقل عمر المتسابق عن سنة ولا يزيد عن مية سنة ...
2- ان تكون الطبخة سهلة بحيث يستطيع العزوبي عملها بنفسة من دون الاتصال بأمة او اختة او بصديق للمساعدة ...
3- ان تكون المقادير في متناول يدة ((يعني لاتجبون لة طبخات فرنسية او ايطالية ....حدة طبخات عربية )))
4- ان تكون طلباتها متواجدة بسهوله فى كل مكان ... :
5- ان تكون الطبخة من نوع <<<طباخ نفسة ....يعني مافيها بربسة واجدة ...
6- ان تؤكل في كل وقت يعني مهب مخصصة لوجبة معينة ....لانكم تعرفون العزوبية كل الوقت عندهم واحد ..يعني ياكلون وجبة الغداء على انها عشا والعشا على انها فطور ..
7- ان يستطيع حفظها بالثلاجة وتسخينها وقت ثاني متى ماجاع لقاها بالثلاجة مجرد بس يسخنها
8- ان تحتوي على جميع العناصر الغذائية ((مثل سبانخ باباي )) يعني مايجية بعد فترة نقص في الغذاء او سوء تغذية ...من كثر مايسويها ...
9-ان تكون الطبخة في مستوى الفول والشكشوكة والبيض يعني زي كذا ...
10- ان يكون شكل الطبخة جميل بحيث يواجه لو عزم اخويا العزوبية عليها ....((ماتدرون يمكن يشوفون سناعته ويخطبونة لاحدى خواتهم ...))
11- ان يستطيع طبخها في البر والمكاشيت ...لانة يجب مراعاة طلعات العزوبية للبر ....
12-يسمح للعزاب المشاركة معنا في هذة المسابقة بحكم خبرتهم السابقة مع المطبخ ...
13- وسلامتكم ...


عجبنى الموضوع ونقلته لكم ان شاء الله يكون فيه فائده ..

[*سندريلا*]

هلا والله برجرج..

بصراحة الموووووووووووووووضوع جنان ...

واكيد انه بيفيد كثير من العزاب خاصة في ذا العطلة .. لان ثلاثة ارباعهم اهلهم مسافرين واهم منطقين في البيت ..

هذي طبخة واتمنى انها تفيدهم ...

المقادير :

1/ كيس صامولي القادسية ان لم يوجد فاي شي..

2/ علبة جبن بووك سايل والا اقولكم هذا مقاطعة جيبو المراعي..

3/ سكينة صغيرة..

4/ ملعقة صغيرة ..

5/ صحن ..

الطريقة :

ناخذ السكينة ونقطع بها الصامولي بالطول..

وبعدها ناخذ الملعقة ونعبيها جبن وبعدها نملطها بالصامولي..

وبعدها نضعها بالصحن ..

وبالهنا والعافية لشبابنا الاعزاء..

سلامي
س
ن
س
ن

[يويو مرات]

لاحد يضحك بليز اخوكم يويو


من جد احب السليق ............

بس انا احب اطبخه ههههههههههههههههههه ......

المقادير بصل وتقطعه قطع صغيره وتحمسه وتقطع الدجاج ...

نص نص وتغلي الماء في الغلايه وتسكبه في القدر وتحط ملح وماجي ابيض وتنقع الارز المصري...

ويطبخ 40 دقيقه وتطلع الدجاج وتشخل البصل وتكب الارز المصري وتحط الدجاج ...

في الفرن 15 دقيقه وسليق 30 دقيقه ولا تنسى الشطه الحاره ....

مشكوره اختي على الموضوع المهم جاي بوقته ....

[ملاك]

ياحبيلك ياسنسن والله تجنن كلمة نملطها ذكرتني بأمي الله لا يخليني منها

بس أنا متأكدة انك بتفوزين في المسابقة ..طبختك خطيرة ومبتكرة


أخوي يويو

أنا أموت في السليق ودايم يجي على بالي بس للأسف اللي عندي ما يحبونه والسليق

حلاته ياكلونه جماعة



اختي رجه والله موضوعك رزه ويجنن

أما الطبخة اللي عندي سهله ولذييييذة

توست منزوع الأطراف يصف في صينية

علبة زبادي +2ملعقة مايونيز تحرك وتدهن ببعضها طبقة التوست اللي في الصينية

بصل مكشن يوضع عليه علبة تونا ونص مكعب ماجي ويحرك على النار قليلا

اللي مايحب التونا يبدلها بدجاج فيليه مقطع أومفروم

وإذا رفعناه عن النار نضع خس مقطع شرائح رقيقة


توضع كشنة التونا على التوست والزبادي

نضع طبقة توست منزوع الأطراف على الكشنة

نرص بيدينا طبقات التوست علشان تمسك في بعض

ندهن باقي الزبادي على التوست

للتزيين : جزر مبشور وبقدونس مفروم ترش أعلى الصينية


وعند التقديم نقطعها لمربعات صغيرة

وبالهناء والعافية

ولاتسون تعزموني آكل معكم

[رجة بس رزة]

بصراحة توقعت ردود اكثر من كذا بس معليش
اشكر كل من زار الموضوع واضاف طبخة؟؟

الحين ابختار احلى طبخة عزابية وتفوز بها:36_17_7[1












من تتوقعون







من كثر الللي كاتبين تراهم ثلاثة<<< اخلصي علينا:UFO-dog::

















تستحقها ملاك يعطيك العافية عالطبخة الحلوة والسريعة...:sl1:







سنسن.,يويو
شاكرة لكم اجتهادكم... وطبخاتكم تراها تجنن بس اخترت الاسرع والاحلى..

اختكم..رج رج:36_3_12[1

[هبوب]

الله واكبر عليكم يالبنات
على بالكم تعرفون الطبيخ ..
المشكله تجي الطبخه بـ منّه

الرجال فينا لا طبخ تعالوا ذوقوا طباخته
مهوب مثلكم
أندومي وفشارات وكاكاوات وهمبرقرات

الفطور : جبن
>> شي جاهز

الغداء : ما أشتهيه !!
>> عشان ما تغسل المواعين

العشاء : اتركوا لي شوي
>> عجازين


المهم

أذكر الجميع

حطيت لكم طبخه إنما إيييييييييه

تلقونها في قسم منتدى الطب والصحه

>> هذا إذا ما غيروا الأعضاء مكانها <<


وشكرا

[رجة بس رزة]

هلا فيك اخوي هبوب منور الموضوع

الرجال فينا لا طبخ تعالوا ذوقوا طباخته

صراحة الحق ينقال الرجال طبخهم مهب شين<<من قده

بالنسبة للبنات اعترف مايعرفون يطبخون بس امهاتهم عليهم طبخ يدوووخ,,

الفطور : جبن
>> شي جاهز

الغداء : ما أشتهيه !!
>> عشان ما تغسل المواعين

العشاء : اتركوا لي شوي
>> عجازين


كلامك واقعي مية بالمية%
مسكتنا مع اليد اللي توجعنا
بس مهما كان فيه عيال عجازين بعد مو بس البنات,,,

[ابن عبداللطيف]

انا بصراحه منيب عزوبي ولا اعرف المطبخ الا اذا بغيت اشرب مويه



بس اذا تبون طبخه تصلح للعزوبيه ابشروا ان شاء الله قرريب


وترى يا رجه هالماثل امامس مادرى عن الموضوع الا اليوم


وان شاء الله الايام الجايه نشوف حماس اكثر



سلملم

[ملاك]

كللللللللللللللللللوش

الله يعافيك ويسلمك اختي رجه

ومالك اختي الا اللي يصلحها لك ويوصلها لعند باب بيتكم


يله خلي اكيد العذال

أجل تقولين خفيفة وسهلة ويقولون سليق


والا تقولين مع جودة النتائج ويقولون خبز مملوط بجبن


خليهم يحترون اني فزت

وهذا الدليل


http://www.ushiqer.com/vb/images/smilies/sl1.gif


الف شكر ...ولا تحرمينا من ابداعك

[فتاة أشيقر]

رجه بس رزه

موضوعك حلو

بس قبل ماأكتب الطبخه

بأبلغ بعض الناس انهم مايغترون بأنفسهم...


الطبخه:::


بعدين ,, اقروا المقادير مع الطريقه واعرفوها

يقطع البصل حسب الرغبه من ناحية الحجم

ثم يحمس في زيت على النار


بعد ذلك يقطع الطماط ويضاف على البصل,,,

وبعد خمس دقائق الى عشر يضاف مقدار من البيض((طبعا مفقوش ومخلوط))


ثمين يضاف القليل من الملح والبهارات



ويطلب من البغاله كيس خبز



وبعدين اذا قضت الطبخه تحطه بزبديه أو باديه حسب المسمى


وبعدين تسمي بالله وتقطع قطعة من الخبز وتغطها بالطبخه وتبلعها


يميم يم قامت تقطر سعابيلن





هاه عرفتوه,,


أكيد هي الشكشوكه






تحيتي::فتو,,,

[ولد الضيعة]

عادي اشارك ,,,, صح ؟؟


انا ناوي اقووولكم طريقة مكروووووووونه اللي بالقواقع يا زيينها زينااه بس ما ادري وشلون تسوى ,,

واصلا انتم شي يسوى بسرعه قل به قل به ,,

عندي طبخيتن :) >>>>> مشكلته سنع هالولد هههههههههههههه

بسم الله ,,

الاولى :

تجيب طول الله عمرك كم بيضة وتفقشها عاد حطها في بادية ,,

المهم ... وحط عليها ملح ((كانك منتب شايب ولا فيك ضغط )) ثم حركها حركها الين يعني تصير زي المويه اللي تمطط

عاد انت بتمل وتووقف هههههههههههههههههههههه >>>> مايعرف يشرح

المهم تجيب طال عمرك مقلاه ذي الدائرية ولها عصى طويله ,,

وتحط فيها شوي زيت ,,

ثم تحطه على النار وتحط عليه البيض ,,

الين تحس انه زين :)

ثم دبر لك خبز واقعد كل عاد الين يخلص ثم قم غسل >>>>>>>>>>> خلاص يبو يبون الطبخه بس

الثانيه: (( تصلح مع البيض عادي ترى ))

جب كم صحن من هالصحون الصغار ,,

وطلع لك جبن وقشطه (( يفضل فراوله )) وعسل وطحينيه (( يفضل طحينيه شعر )) واللي في الدرج عااد على حسب

باما ومربى .................الخ على قد الصحون ههههههههههههه

وحطهن في صينيه وجب خبز وكلهن ,,

عااد سو لك شااهي لا هنت ,,

تبون اعلمكم وشلون ؟؟

>>>>>>>>>> له مواقف سيئة مع الشاهي ههههههههههههههههه

جب بريق وحط فيه مويه وحطه على القز وخله لين يفوووح ثم حط عليه شااهي وسكر

وزد عليه مويه الين يغلي ,, ثم عااد حطه في الصينيه حقتنا ذيك حقت النواشف والبيض ,,

وجب لك كوووب ووافطر او تغد او تعش اللي تبي , ,


كانها ماجازت لكم نقولكم ثانيه ,,


يله سي يو ,,

[دلوعة امي]

ههههههههههههههههههههههههههههههههه
عليكم طبخات تجننننننن بحاول اسويها انشاءالله
اما انا اعذروني مااعرف اطبخ دلوعه وماتطبخ
هههههههههههههههههههههههههههههههه

[ابن عبداللطيف]

اقول وش ذا لطبخات


اللي حاط لي شكشوكه



والا بيض والا نواشف


ولد الضيعه عطنا مكرونه قواقع الله لا يهينك


-----------------------------------------------------------------

وبالنسبه للطبخه


اجيبها لكم بعدين << من هاك اليوم وانت تقول بعدين اخلص علينا


ان شاء الله قرّيب



سلملم

[*سندريلا*]

ياااااااااااااابعدي والله اني رحمتكم ..

ماوجعتكم بطونكم من ذا الخبز...

صراحة انتم مشكلة يالشباب .. ياحد يطبخلكم والا مانتم مسوين شي...

والله انكم بلوى على المجتمع...

يالله باعطيكم طريقة اكله خلكم تغيرون شوي عن ذا الخبز...

المقادير اوالطريقة...

رح لم البقالة واشتر كرتون اندومي ب40 ريال .. وبعد كذا ارجع للبيت .. وخذ قدر الحجم اللي انت تبيه وصب فيه مويه

مغلية وولع عليه النار الى ان يتشتش <<< يمديكم على الكلمة.. وبعدين كب الاندومي عليها وغطها بالغطا ورح عاد انت شف برنامج والا فلم وبعد عشر دقايق ارجع لها وصكر عليها النار وكبها في صحن وحط معها فلفلها وبهاراتها ولاتنسى الشوكة ...

وبالهنا والعافية...

[ولد الضيعة]

ولد الضيعه عطنا مكرونه قواقع الله لا يهينك

ما أعرف والله عاد لذا الحركات ,,


ولا كان حاطها من قبل ,,,


سي يو ,,

[ملاك]

السلام عليكم ورحمة الله وبركاته

جيتكم مرة ثانيه وبعطيكم وجبة خفيفة ولذيييييييييييييذة وفي الأخير شكلها مررررره حلو

بس أحب أرد أولا على الغيورين وأقول .. اللي ما يطول العنب.........

ثانيا أهنيها على الإكتشاف العظيم اللي سمته الشكشوكه

بصراحة أول مره اسمع فيها >> لا وبعد تعلمنا انه لازم نفقش البيض


الحين محطوط في الموضوع أن الطبخة المطلوبة من طقة الشكشوكة تروحين تحطين طريقة

الشكشوكة >> صدق هنود

الله يعين رجلك (زوجك) مو قدمك.. أكيد غداه وعشاه وفطوره شكشوكه>>هئ هئ هئ

والآن الطبخة >>خلصت هايشه

توست منزوع الأطراف يفرد حبة حبة



عند فردها نضع شريحة مرتديلا >> دجاج ؛ديك رومي ؛ غنم ؛ بقر.....المفضل لديكم

وفوقها شريحة جبن >> شيزدل أو أي نوع

ثم تلف رول

ثم تغمس في البيض ثم في البقسماط ثم تقلى بالزيت

ثم تؤكل ساخنة

وبالهناء والعافية





ترا أنا ماخذه الموضوع جد والربع يتتريقون



ياعمري ياأنا

يالله كلش على أجره

راحمة هالعزاب الضعيفين اللي في ديرة واهلهم في ديرة

بس شكلهم ما يستاهلون

[***النحلة***]

اقول عاااد مافيه مثل طبختي<<<<<احم احم>>>ايه واثقققققققققه بما اني نحله
المقادير ::منيب قايله عسل علشان فيه بعضكم ما يحبه
توست منزوعة الاطراف تدهن بمايونيز ثم نضع عليها مورتديلا (سنيوره و الوطنيه بالزيتون
شريحه من كل نوع
شريحه جبن
خس( مغسول مفروك معقم)
شريحة طماطم
*******************************************
الطبخه الثانيه(الكودو )ولا كودو يقدر يصلح مثله)
دجاج بدون عظم يقطع مكعبات صغيره ويغسل ثم يتبل في صلصة الصويا المعتدله لمدة نصف ساعة او ساعة
يقطع بطاطس قطع صغيره ويقلى نضع في تاوه بصل وفلفل اخضر (الخكري)بعض الناس ما يعرفه الا بهذا الاسم مع الاسف بعد ذلك نضع عليه الدجاج المتبل ونستمر في التحرك بعد ذلك نقصر على النار علشان يتشرب الدجاج التتبيله
ثم نحضر صامولي وندهنه بمايونيز ونضع عليه الدجاج والبطاطس مع حلقات الخس
وبالعافيهههههههه
وش رايك استحق الفوز ولا لا

[@أسير أشيقر@]

الطباخات رائعة

ولكن ألا يستحق هذا الموضوع المميز لهذا الشهر أن يكون له طبخات خاصة وغير معروفه لدى الجميع

فمن خلال ماتصفحته رأيت أن بعض الطبخات أراها دائما وهي معروفة

وأدعو خبراء الطبخ إلى طرح طبخاتهم المشهورة والغربية

نريد تجربة شيء غريب وفريد فافيدونا جزاكم الله خير وملئ بطونكم بالعافية :)


دمتم بخير

[الساهر2005]

شكراً لك اخي الكريم على هذا المقال

بس ياليت فيه صوره عشان نشوف شكل الطبخة

[عذب القوافي]

مشكووووووووووووور اخوي رجة بس رزة على الطبخة الي طعمها يهبل وسهلة مرة
وكل المقادير موجودة
لكن تدري انا عندي طبيخة اسه واسهل تدري وش هي
بعدين اقولها
مع تحياتي:050103hrm

[بنت عكل]

<<<<<<<<<<<<من زمان ما طبخت

مع اني طباخه ماهرره

ابتذكرر لكم كمن طبخه حلووووه وخفيفه

وراجعه لكم

[فتى اشيقر]

اشكركم على هذا الموضوع الجميل وصح لسانك يا هبوب وخذو طبختي:""" كيس خبز صامولي يفضل نوامي طازه وحليب السعودية نصف لتر وجبن كاسات وزبده ,,,,,,,,,,اليكم الوصفة.............

ناخذ الصامولية ونقطعها شرايح ونجيب قدر ونحط فيه الحليب ونغطس الشرايح في الحليب ونملطها بجبن ونرش عليها زبده وثم نجمع الشرايح في صينيه ونحمرها في الفرن لين تيبس .......................انتهت الطبخة .......... وانصحكم تجربونها

[العكلاوي]

يالله جاكم العكلاوي ملك المطبخ

اخواني احب أن أقدم لكم طبخة انما أيه وطبعاً هي الاحب عندي من بين الطبخات .... ماخذ الموضوع من جد

أسم الطبخة (( كفته ))
المقادير ::
لحم مفرووم
بصل
ثوم ..... يا عيني على الثوم
بقدونس
الملح
بيض
بهارات مشكلة أو كاري
بقسماط أو خبز مطحون

(( الطريقة ))
أولاً / نقطع البصل والبقدونس تقطيع صغير او نقوم بفرمهم بالفرامة ونضيف لهم الحمة
المفرومة ونضيف لهم البهرات والثوم والملح
ثانياً / نقوم بتكوير الحم المفروم كرات متوسطة الحجم أو حسب الذوق
ثالثاً / نقوم بغطس الكرات بالبيض ونحاول أن لا نتركها مده طويلة اغطس وطلعها على طول
رابعاً / نقوم بوضع قليل من البهرات والملح على البقسماط
خامساً / نقوم بغطس الكرات في البقسماط حتي أن تتغطا كلها بالبقسماط
سادساً / نقوم بوضعها في الزيت حتي تتحمر

وبالهناء والعافيه

واللي يسويها يعلمني اتعشى عنده


أأأأأأه ه ه ه ه ه ه ه ه ه نسيت

أحببت أن أشكركي يا رجة بس رزة على هذا الموضوع الجميل واذا اردتي طبخات ثانية تراي سداد

ارجو أن أكون قد وفقت في وصفتي هذه وفي طريقتها

ولكم تحياتي


احب أن أشكركي

[.. شـــوشـــو ..]

السلام عليكم ورحمة الله وبركاته ...

هلا والله بوخيتي .. رجة بس رزة ..،

من زمان وأنا شايفة موضوعك وعاجبني حيل بس ما رديت :)

ويوم نويت أرد لقيت الأخت ملاك كاتبة الطبخة اللي كنت بأقولها >> شكلها تقرب لي :UFO-dog:


للأسف ....

الطبخات العزابية الحين /

الوجبات السريعة ... هرفي وطقته !!

صاروا عجازين بزيادة !!

ومقاديرهم :

1- فلوس :)

2- توصيل ..

3- شاي أخضر >>> من بعد التخمة :)

الله يعين بس ..

وبالنسبة للطبخة عندي لكم شابورة لذيييييييذة بس أخاف أقولها وتهزئوني تقولون :

احنا قايلين طبخة !!!!

عموماً إذا موافقين أقولها قلتها ..

ومشكوووووورة على هالموضوع اللأطة ..


وبانتظار جديدك ..

وخيتك .. شـــوشـــو ..،